كلمة حق الشيخ زايد

جيت اسلم
القصيدة: جيت اسلم

ويشهد الله يوم جيتك يا طويل العمر كني

زاير الشعب السعودي في محله بيت .. بيت

قبل اشوفك من وصوفك غير ذكرك ما فتني

وبوجودك ومثل جودك لا سمعت ولا رأيت

جيت اطوي لك مسافات الدروب اللي طوني

ما عنيت الا لوجهك بس كني ما عنيت

خطوتين من الكويت لبحر جده وجمعني

مع سموك يا سمو المجد يا فيصل وجيت

والشعر لو ما رهنته تحت كفينك رهني

لان لو للطيب مبدأ فانتا اول من بديت

انخلق لله وجودي وانخلق لرضاك فني

لو تحب اكتب كتبت لو تحب امحي محيت

وش بغيت آمر تمنى لا يغرك صغر سني

شايف نجوم الثريا جبتها لك لو بغيت

لو بعيش اعطي كفوفك مثل ما كفوفك عطني

لا تحسب اني بوفي لو عطيت ولو عطيت

اشهد اني ما وفيت ولو وفيت انشهد اني

قلت عن نفسي مقصر واشهد اني ما وفيت

لأنك اغلى من عروقي والوريد اللي سكني

واعتزازك تاج يبقى فوق راسي ما حييت

لاختلف في شخص ظنك لازم اخلف فيه ظني

وان رويت الماي مثل ما اظمى لا ضميت

وان زعلت ازعل وبرضى لا رضى قلبك لأني

واجب ازعل لا زعلت وواجب ارضى لا رضيت

انت مثل البحر تعطي والعطا ثقل وتأني

بس هو يعطي وياخذ وانت عمرك ما خذيت

محتفظ بأسمى صفاتك ومتبنيها متبني

وامتداد الملك خالد معدن وصوره وصيت

كن الارض تقول يوم اقدام خلق الله وطني

بعد رسله والصحابه انت خير اللي وطيت

يا طويل العمر لولا المستحى بتمل مني

قالوا ان لم تستحي من شي فأفعل ما اشتهيت

والا انا لولا الملامه والنصيب اللي حظني

كان ما اسري من محلك لين ما اشوفك سريت

من كثر فرحي بشوفك من نشد وش صار عني

بس اسولف عن سموك صار كيت وصار كيت

لو ينال المرء ادراك المطالب بالتمني

كان اجل هموم قلبي تنتهي لو قلت ليت

مغترب جيت متعني لك ولاني بمتعني

وقتها كني رحلت من الكويت الى الكويت

بس والله يوم جيتك يا طويل العمر كني

زاير الشعب السعودي في محله بيت .. بيت