كلمة حق الشيخ زايد

كلمة حق الشيخ زايد
القصيدة: كلمة حق الشيخ زايد

ياليت كل شعوبنا قد الآمال

وياليت حكام العرب مثل زايد

الله خلق صرح البطوله للأبطال

وما للرياده عرش من غير رايد

عديت كلمة حق والحق ينقال

لا عودت يم الفعول الفرايد

خلوا سواليف الحزاوي والاطلال

واخذوا من الواثع علوم وكايد

الفعل والله فعل زايد لي قال

مهوب فعل متبعين الجرايد

اكرم من اللي يطعن البخل بريال

والهب من احساس الحطب بالوقايد

واصدق من الدمعه على خد الاطفال

واثبت من اسوار الحصون السدايد

فعله لحال وفعل خلق الله لحال

قايد ويحسب عن ثمانين قايد

الكامل الله بس هو كامل افعال

سموه زايد لأنه انسان زايد

رحمة من الله جت على شكل رجال

عضيد لكن عن جميع العضايد

لو ما القصيد تكتبه فخر وجلال

اجل من اللي تنكتب له قصايد

يا بعد عمر الشعب والجاه والمال

يا ذخر ربعك بالليال الشدايد

يا رهبة هزت سراجيف الانذال

يا شوق تلعات الرقاب الرغايد

بنيت جيل وصرت نبراس الاجيال

عدلاً على سبع الامارات سايد

رغم الكلل علمتنا نيل الآمال

ووحدتنا رغم اختلاف العقايد

لك صرح حافل بالمحبه ولا زال

وان بادت صروح الغلا ما انت بايد

لو بالأبوه كل ابونا لك عيال

ولو بالمروه كلنا لك سنايد

يا شيخ درع درعك ورجالك رجال

شعباً زرع لأرضى زعيمه شهايد

تعلموا من نخوته ضرب الامثال

وصارت لهم تصرفاته عوايد

ان قلت زايد .. زايد سلوم وخصال

وان قلت قايد عن ثمانين قايد

ما اقول طيبه لا حضر يعمل اعمال

ومحبته تجمع قلوب وبدايد

اقول لو الطيب مخلوق رجال

يحب الارض اللي تحت رجل زايد