كلمة حق الشيخ زايد

سيرة بحر
القصيدة: سيرة بحر

وكذب يزودنى مع الناس نقصان

ومدحٍ مهو بمستحقه مذلّه

لأن اللسان حصان ولساني حصان

ولأني من اللي زلته بألف زلّه

شاعر واسخرها على كل الاوزان

مثل السحاب يهمل ما ينهمل له

اكتب واعز فلان واقدر فلان

ولا امدح الطيب عشان استغلّه

اليا مدحت امدح فعايل كحيلان

المدح ودك ينذكر في محلّه

وان كان شعري جنّب الشيخ حمدان

في ذمتي ملعون ابو الشعر كلّه

هذاك طيبه طيب وبطانه بطان

هذاك خيره للنجوم المطله

هذا اللي يجمعنا على حبه إخوان

هذا اللي ما قد فرّق اصحاب للّه

منبع نهر في بلاد ويعم بلدان

سيرة بحر لو ما تخافه تجلّه

رحمة من الله بس .. في هيئة انسان

انسان لكن منخلق لجل ملّه

نجمٍ جعله الله بنادم على شان

يثبت لكم كيف التواضع جبلّه

شيخة رجل ماهي بشيخة صبيان

منهج نبي يعمل مهو بينعمل له

إن (نام واعي) كنه الذيب سرحان

و إن (قام ساعي) كن بالموق ملّه

فارس ولد فارس ومن روس فرسان

المجد لابق له وهو لابقٍ له

هو بس مرهق ذهن ؟ قل مرهق اذهان

ماهو بإسمه أو بجسمه .. بظلّه

رجل جمع عزيمة الانس والحان

تثنى الجباه الشامخه حشمةٍ له

لأنك سليل اللي ظفر بألف ميدان

لي ضاق سلّك وانت لي ضقت سِلّه

يا درعه اللّي لو يلينون ما لان

يا سيفه اليا صاروا إعداه شلّه

يا فزعة اللّي هزه الوقت وانهان

يا شوق خدرات الرموش المظلّه

لابد للناجح حبايب وعدوان

ومثلك نجاحاته زَخَم في سجلّه

تمطر شبر وتغيض مليون شيطان

تكبر وغيرك يندفن تحت غلّه

دامك ربحت المرجله منت خسران

اللّي يبي المجد يحصل بيحصل له

مكسب شرف يغنيك عن مكسب حصان

كلٍ يحدد له هدف لايقٍ له

يومك مغلّف بالحنايا والابدان

غيرك ولا حصّل غلاف المجلّه

من يلا استهان بقيمة الناس ما هان

و من ذل نفسه للخلايق تذلّه

الحب حاجه ما تقدر بالاثمان

والصيت يوصل بس ما ينوصل له

والخوّه اللي مثل خوّتك تنصان

لأن اللّي لهم مجد قلّه

و حنا رجالٍ ندمن الصحبه إدمان

و انته رجل من يعرفه ما يملّه

بعض الشيوخ يزيدنا عرفهم شان

وإلا بعضهم معرفتهم مذلّه

لو يمدحون فلان وإلا فلنتان

حنا نحبك والمحبه من الله

تكفى يابو راشد ليا جيت حمدان

دنق عليه وحب خشمه وقلّه

لو إن ربي جامع الطيب بإنسان

عزالله انك تاخذ الطيب كلّه