القصيدة
وما نذبح البسمة ليا من حكينا وما نفرض الغلطة على البيض والسود
من طبعنا لا من عطينا عطينا جودٍ من الموجود والجود موجود
بعنا المذلة للضعيف وشرينا عزة نفوس وجد وإخلاص وعهود
نضرب خطانا بالعصا لا خطينا حتى ولو كان الخطا غير مقصود
وما نِزعل أصحاب الجمايل علينا هذا وحنا نجزي الجود بالجود
يكبر غضبنا لا تعزوى حدينا نرضيه لو نبذل على ارضاه مجهود
واليا انتخنّ المترفات اعتزينا نفزع ولا نرضى على البنت منقود
نزعل ونغضب وان زعلنا نوينا كن الهدب والعين نارٍ وبارود
نرضى نموت ومجدنا في يدينا ولا نعيش بمجد ضايع ومفقود
نعم خضعنا روسنا وانحنينا لله ولا غيره مع الناس معبود
مثل الغصون اليا انثنن انثنينا وقلوبنا خشّاع ركّاع و سجود
نتبع ونامن بالرسل واقتدينا بمحمد وعيسى وموسى وداود
خفنا من أسباب الضياع إن قرينا بأهل الجحيم وقصة أصحاب الأخدود
نمشي على كف التراب وروينا من قلب مزنً مرعدٍ يرعد ارعود
يكفي فخرنا بأصلنا لا انتخينا حنا عرب من واقع جدود لجدود
ما قد تعلمنا الخطا واعتدينا ولا وقف في صفنا شخص مضهود
الصبر فينا مبتلي وابتلينا نصبر ولا نرجي من الناس مردود
لو يشتكي منا التعب ما شكينا ولا تخلّفنا ولا نخلف وعود
حنا ليا منا وعدنا وفينا واليا نوينا قد الأفعال وقدود
غير القلوب الخاشعة ما رجينا والدمعة اللي تجرح أوجان وخدود
لا الكره قايدنا ولا الحقد فينا ما احنا من اللي يجزي الطيب بجحود
هذي عوايد طبعنا واكتفينا الله خلقنا ازهود ونفنى له ازهود
أقولها والله وكيل علينا بسم العلم لا صار عالي ومرصود
أقولها . . أقولها وانتهينا حنا الكويت قيادة وشعب وجنود